لا تصحب الهين ولا تنتخي اللاش
واسلك دروب المرجلة وانت زاكي
وارقى بنفسك للصعيبات مغباش
وانهض مع المظلوم لو جاك شاكي
المرجلة بالسيف وحربة و رشاش
ماهي بكثر الثرثرة والتباكي
بالعلم ابدا ما هو بطاش ما طاش
ولا بالسوني والشيش والجراكي
واحذر من اللي دايم الوقت غشاش
لا يسندك في شي ولا هو براكي
وأحذر مصاحبة الغبي شخص رباش
يرميك في حتفك بوسط الشباكي
وابعد عن اللي يطلب المجد بفلاش
الشكل نشمي والمخابي مكاكي
وعزاه من شخص تسلمه رشاش
ويلفها ويدور ويرجع يحاكي
وان دلهمت سود الليالي بينحاش
لا تسامحه ابدا وان جاك باكي
وخلك على سود المهمات قشاش
لا تنتظر حظك يجي بالفكاكي
من يبتغي العلياء دفع لها كاش
ولا دوينات السلع في الشراكي
وأكرم بمالك دام باقي وتعتاش
لا يردعك كثر العذل والبواكي
كل البشر تفنى ولو عاش ماعاش
القبر واحد و خاتمتنا هلاكي
واقولها مليون والراس محتاش
لا تصحب الواطي ولا اللي يكاكي
وختامها مني ولا هي على ماش
الرب عالم وفي الحنايا حواكي
(
(
