بحر الجروح اللي تلاعب شواطيه
قلبي غدا له تالي الليل قارب
يبْحر على موجه ويجهل مراسيه
ويعيد للذكرى حديث التجارب
لكن تفاصيل العطا والمشاريه
صمتٍ يخيّم فوق ذيك المضارب
لين استباح الوجد مايخفي التيه
والبُعد مظلم بعد نور التقارب
والنفس مازالت تنفّس تواليه
صبرٍ توشـّح فـعل ،، سدد وقارب
وليل العنا يقبل وتقبل مواريه
والصبر يمسي بين لحية وشارب
وانا ماقـلت آمـوت منّه ولا فيه
لكن فراقه مـثل سـم العـقارب
اشتاق له وآعيد ماضي لياليه
ولازال باب الوصل صوبه موارب
عليـه مـنّي كـل مـالاح طاريه
عشقٍ صفت لاجله جميع المشارب
وانا مـازلت اللي يـحـبّه ويـغلـيه
وان زارنـي طـيفـه ماعـاد آتغارب ..
تحت الضلوع العوج عاشت بواقيه
تاخذ لها مثل ،، استراحة محارب ،،
(
(
