زانت قوافي القصيد وزان تلحينه
جزل المعاني تجاوب ندّر الحانه
والليل بحرن ليامن زل ثلثينه
يبحر بفكرك .. ولا يمديك عصيانه
الله .. ياذكريات الحب وسنينه
على النقا والتقا ساسه وبنيانه
ياوجد قلبي على شوفة محبينه
وجد الغريب الذي مشتاق لأوطانه
وجدي على اللي ذبحني ملحه وزينه
المترف اللي رجح بالوصف ميزانه
مشتاق لمشاهده ومصافح ايدينه
ولضحكة مبيسمه لا فل حجانه
اللي سهوم المنايا من هدب عينه
وطعم السوالف عسل لا مرت لسانه
مثل الصباحات والورد وبساتينه
إطلالة بالجمال العذب رويانه
سبحان من صوره وابدع بتكوينه
كل مابدالي ذكرت الله سبحانه
فيه الحيا والعفاف أسما عناوينه
كل الصفات الحميده تحت عنوانه
عذب السجايا ولابه شيٍ يشينه
مادنّست سيرته من عهد جدانه
متعاهدين الوفا مابيني وبينه
لآخر سنين العمر ماواحدن خانه
(
(
